Vit eru mitt í jólaborðhaldstíðini, og tað merkir eisini, at nógv fólk eru í býnum, og harvið nógv at gera hjá løgregluni.
Løgreglan varð boðsend fleiri ferðir í nátt, men ongi álvarsmál vóru, sambært vaktleiðaranum á løgreglustøðini.
Ein maður varð tó handtikin, og fær eina bót fyri brot á skilhaldsreglurnar.
Hetta var í býnum í Havn, har løgreglan varð boðsend í sambandi við at ein maður vísti harðligan atburð. Hóast maðurin ikki gjørdi skaða á nakran, varð atburðurin so ógvusligur, at løgreglan valdi at handtaka mannin. Hann verður leyslatin um middagsleitið, og fær bót fyri brot á skilhaldsreglurnar.
Annars hjálpti løgreglan fleiri fólkum, eitt nú við at koma upp beinini aftur í hálkuni. Onkur varð koyrdur til hús, og onkur annar á skaðastovuna. Eitt nú varð ein brotin hond staðfest.
Ferðsluløgreglan var eisini úti í nátt. Á Glyvursvegi – obligatoriska ferðafellan niðan á Hamarin á Argjum – varð ein bilførari skrásettur fyri at hava koyrt 84 kilometrar um tíman. Viðkomandi fær eina treytaða frádøming av koyrikortinum.
Vinarliga broyt tínar kennifíla - og privatlívsstillingar fyri at síggja hetta innihald