Nólsoyar kirkja fær nýggjan messuakul í morgin

Til guðstænastuna í Nólsoy skírisdag, 17. apríl, verður ein nakað serlig hending. 

Tá verður ein nýggjur messuakul vígdur og tikin í nýtslu. Hesum boða umboð fyri Nólsoyar kirkju fyri.

Tað er Evy Toftegaard Nielsen, deknur, ið hevur sniðgevið akulin. Nólsoyingurin Ragnhild Joensen Battefeld, er búsitandi í Danmerk men hevur seymað.

Ein messuakulin er prýði, ið til dømis prestur ber við messu uttan yvir messuserki. Hesin er grønur og hevur myndevni úr kirkjurúminum, eitt nú bordur, kornaks og krossur.

Við guðstænastuna luttaka Uni Næs, dómpróstur, Anne Mette Greve Klemensen sóknarprestur og Emil Olsen stiftsprestur. Undir guðstænastuni verður eisini eitt barn borið til dópin.

Guðstænastan í Nólsoy í morgin, skírisdag, byrjar klokkan 11.