Noreg: 100 prosent kvinnulig umboðan

ST-aðalfundurin í New York hesa vikuna var søguligur á tann hátt, at eitt av limalongunum varð umboðað, einans av kvinnum.

Tað vísir Facebook-profilurin hjá ST á og vísir hesa myndina av sendinevndini hjá Noregi til aðalfundin.

Bert konufólk er á myndini. Vit síggja norska forsætisráðharran, Ernu Solberg, saman við Ine Eriksen Søreide, uttanríkisráðharra, Monu Juul ST-sendikvinnu og stórtingslimirnar Liv Signe Navarseta, Ingjerd Schou og Lindu H. Helland.

Eitt av málunum hjá ST er at fremja javnstøðu millum kynini í 2030.