Føroyskar, danskar, týskar, spanskar, kinesiskar – nógvar eru orðabøkurnar, sum finnast á Sprotanum, og í næstum verður ein japansk-føroysk og ein føroysk-japansk orðabók løgd afturat.
– Tað er vorðið so mikið væl umtókt hjá føroyingum at læra seg japanskt, at vit halda, at tey, ið fara undir kvøldskúla í japonskum í heyst, eiga at sleppa at arbeiða inni á Sprotanum, skriva tey á Sprotanum í tíðindaskrivi.
Japansk vika er í Havn, og í hesum sambandi bjóðar Sprotin til hugnaløtu við japanskum dámi, har hátíðarhildið verður, at japansku orðabøkurnar gerast tøkar á Sprotanum. Tað verður týskvøldið 23. august klokkan 20 í Reinsarínum.
Á skránni verða røður, upplestur, tónleikur, og ymiskt gott til góman verður at fáa.
Tað eru hjúnini Sunnva og Hiromasa Asano, sum í tvey ár hava arbeitt við orðabókunum, og higartil hava tey fullfíggjað 10.000 leitorð í hvørjari bók. Orðabókaarbeiðið heldur sjálvandi fram, og bøkurnar fara at vaksa fyri hvønn dag, skrivar Sprotin.
Vinarliga broyt tínar kennifíla - og privatlívsstillingar fyri at síggja hetta innihald