Per Højgaard farin 

Í gjár bórust boðini um, at royndi journalisturin og samskiftisráðgevin Per Højgaard úr Havn er deyður eftir drúgva sjúkralegu, 49 ára gamal.

Per Højgaard var kendur í føroyska almenninginum, serliga fyri tíðina tá hann saman við journalistfelaganum Kára Durhuus dekkaði fullveldissamráðingarnar á Christiansborg seinast í nítitalinum fyri Útvarp Føroya.

Sum journalistur hevði hann royndir frá bæði útvarpi, sjónvarpi og bløðum í Føroyum, men serliga er tað arbeiðið fyri Føroysku Tíðindastovuna á Christiansborg, sum hann verður mintur fyri. Per Højgaard átti eisini ein týðandi leiklut í heimildafilminum ”Færøerne.dk”, sum leikstjórin Ulla Boje Rasmussen gjørdi um fullveldissamráðingarnar.

Seinni á starvsleiðini arbeiddi Per sum samskiftisráðgevi. Hann var í starvi hjá Tórshavnar kommunu og hjá Eik Banka.

Eftir at hann flutti aftur til Danmarkar fór hann aftur á Christiansborg har hann virkaði sum ráðgevi hjá Edmund Joensen á Fólkatingi.

Fyri nøkrum árum síðani varð hann raktur av lívshættisligari sjúku, og í gjár andaðist hann, júst tveir mánaðir áðrenn kann kundi verið farin um tey hálvthundrað.

Per Højgaard giftist Maikin Isholm í fjør. Saman eiga tey tvey børn, ein tíggju ára gamla Artur og seks ára gomlu Ingrid. Frammanundan átti Per eina hálvvaksna dóttir, Barba, og ein vaksnan son, Hákun.