Reisigildi verður hósdagin

Arbeiðið at byggja Umlættingardepilin í Hoyvík gongur skjótt og væl, sigur Tórshavnar kommuna, og um fáar dagar verður reisigildi.

Ætlanin var, at tað skuldi vera fyri páskir, men orsakað av koronasmittuni varð hetta útsett.

Reisigildið verður hósdagin 7. mai klokkan 13. Annika Olsen, borgarstjóri, ber fram røðu, og so fer Ewald Kjølbro, stjóri í MT Højgaard, at flyta fram røðu og greiða frá deplinum. Tiltakið verður stroymt á heimasíðuni hjá kommununi.

Depilin er liður í arbeiðnum hjá Heilsu- og umsorganartænastuni at veita mennandi tilboð til heimabúgvandi eldri borgarar, samstundis sum økt verður um føstu búplássini á røktarheimi. Roknað verður við, at umleið 150 borgarar koma at hava uppihald á deplinum um árið.

Umlættingardepilin letur upp til heystar.