Rósa spyr Jørgen um skaðanevnd

Neyðugt er at seta eina skaðanevnd á stovn, sum kann seta í verk neyðugar kanningar av álvarsligum ferðsluóhappum. Tað sigur Rósa Samuelsen, tingkvinna fyri Sambandsflokkin, sum vísir til ferðslutrygdarætlanina hjá Ráðnum fyri Ferðslutrygd.

– Tá eitt álvarsligt óhapp hendir, er tað týdningarmikið at kanna, hvat tað var, sum fór fram, og hvør orsøkin til óhappið var. Kanningararbeiðið skal í síðsta enda tryggja, at vit læra av tí, ið er farið fram og fyribyrgja óhappumí framtíðini.

Rósa Samuelsen hevur sett landsstýrismanninum í fíggjarmálum, Jørgen Niclasen, fyrispurning, har spurt verður, um hann ætlar at seta eina skaðanevnd á stovn, um hann heldur, at ein slík nevnd er neyðug, og um hann hevur aðrar ítøkiligar ætlanir um at fyribyrgja ferðsluóhappum í framtíðini.

Møguleikin fyri at seta á stovn eina skaðanevnd varð eisini umrøddur á Ungdómstinginum í farnu viku í sambandi við viðgerðini av einum uppskoti til samtyktar um at tryggja landsvegirnar ímóti seyði. Tá var tað ein samd rættarnevnd, sum helt, at landsstýrismaðurin átti at sett eina skaðanevnd á stovn.

– Landsstýrismaðurin átti at arbeitt við at sett á stovn eina skaðanevnd, sum fekk til uppgávu at eftirmeta ferðsluóhapp, so tað verður kannað, hví óhappini henda, um tey ofta henda á sama stað, um orsøkin er, at tað er salt á vegnum, ella um orsøkin er, at bóndin altíð fóðrar við vegin o.s.fr. Um funnið varð fram til orsakir og samanhangir, kundi eisini verið arbeitt meira miðvíst við at betra um trygdina á ávísum vegastrekkjum.

Les eisini: – Seyðurin skal av landsvegunum