Russiskt flogfar skeyt rakettir eftir Kyiv

Tað var eitt russiskt bumbuflogfar, sum var orsøkin til spreingingarnar í ukrainska høvuðsstanum Kyiv tíðliga í morgun.

Sambært Vitali Klitjko, borgarstjóra í Kyiv, var talan um eitt flogfar av slagnum TU-95, sum skeyt rakettir úr Kaspiska havinum móti Kyiv, skrivar DR.

Rakettirnar raktu eystaru býarpartarnar Darnytskyi og Dniprovskyi.

Seinastu tíðina hevur annars verið nøkunlunda friðarligt í Kyiv, og hevur ukrainski høvuðsstaðurin ikki upplivað loftálop síðan síðst í apríl. Tá lat ein kvinna lív í einari spreinging í einum íbúðarbygningi.

Framvegis eru ongar fráboðanir um, at nakar hevur latið lív í álopunum í dag, men ein persónur varð særdur og koyrdur á sjúkrahús.

Russland hevur eisini tikið ábyrgdina fyri álopið.

Russiska verjumálaráðið sigur sambært fleiri miðlum, at málið var at raka stríðsvognar, sum Ukraina hevði fingið frá sameindum úr Eysturevropa.