Sama aldursmark fyri øll solarium - kann verða við at verja fyri krabbameini

Heilsustýrið mælir til, at solariumlógin verður víðkað.

Hetta gjørdi stýrið greitt í longri skrivi og tilmælum, sum Heilsu- og orkumálaráðið fekk í summar.

Harvið hevur politiski myndugleikin fingið vegleiðingar um, hvat kann gerast fyri at avmarka solariumnýtslu - serliga fyri børn og ung. 

- Lógin skal víðkast soleiðis at hon eisini fevnir um privatar veitarar av solarium. Í dag er solariumlógin, sum ásetur 18 ára aldursmark, einans galdandi fyri almennar veitarar. Tað merkir, at børn og ung lógliga kunnu brúka solarium í privatum fyritøkum.

Harumframt mælir Heilsustýrið til, at greið regulering, skráseting og eftirlit verða sett í verk. 

Sí eisini: 
Heilsustýrið: Verandi solariumlóg ikki nøktandi

Tað er sjálvandi ein spurningur um heilsu. Og Krabbameinsfelagið hevur nú gjørt greitt, at felagið  tekur undir við tilmælinum hjá Heilsustýrinum.

- Solariumnýtsla er væl skjalprógvað sum krabbameinselvandi og serliga vandamikil fyri børn og ung.

Hetta stendur ovarliga í tilmælinum hjá Heilsustýrinum. Og Krabbameinsfelagið knýtir upp í:

- UV-stráling frá solarium er krabbaelvandi og økir váðan fyri bæði móðurmerkjakrabbameini og øðrum húðkrabba. Váðin er serliga stórur, tá mann byrjar at taka solarium í ungum árum.

Við hesum verður gjørt greitt, at aldursmark eigur at vera galdandi fyri øll solarium – uttan mun til hvør bjóðar tey. At víðka lógina verður tískil eitt týðandi fet rættan vegin at verja børn og ung og at fyribyrgja krabbameini.

Les tilmælið hjá Heilsustýrinum her.