Sáttmálin hjá heilsuhjálparunum góðkendur

Trý ára sáttmálin, sum Heilsuhjálparafelag Føroya gjørdi við Kommunala Arbeiðsgevarafelagið, KAF, fyri tveimum vikum síðani, er nú endaliga góðkendur.

Í farnu viku undraðist á Mary Antonsdóttir, forkvinna í heilsuhjálparafelagnum seg yvir, at sáttmálin ikki var komin í gildi enn, tí at sáttmálin enn ikki var góðkendur av lønardeildini undir Fíggjarmálaráðnum.

Men henda góðkenning er nú komin.

Tað váttar Per Martin Gregersen, formaður í KAF.

- Tað vóru onkrar útrokningar, sum skuldu gerast fyrst, tí hevur tað tikið eina løtu at fáa sáttmálan endaliga góðkendan. Men nú er alt komið undir land, sigur Per Martin Gregersen.