Seðlarnir koma út klokkan 8

Grindin, sum í kvøld legði beinini í Sandavági, verður skorin upp í morgin.

Tað verður klokkan 8, at seðlarnir koma út á keiini í Miðvági. Tað upplýsir Finnbogi Midjord, sýslumaður fyri Portalinum í kvøld.

Enn er ógreitt hvussu nógvir hvalir vóru dripnir, men tað verður mett at vera umleið 50. Nú verða hvalirnir sleipaðir til Miðvágs, har tey síðani verða merktir í nátt.

Helst verður býtt í drápspartar.

Grindin varð funnin tríggjar fjórðingar út fyri Trælanípu nakað yvir klokkan 14 seinnapartin, og tað gekk ógvuliga illa at fáa rakstur á hana. Fyrst varð roynt at reka hana til Sandavágs, og síðani hinvegin, til Bíggjar, men einki riggaði.

Í kvøld eydnaðist langt um leingi at fáa rakstur á, og grindin varð hildin til um hálvgun tíggjutíðina. Og hevði raksturin gingið illa, so gekk drápið tíbetur væl.

Sí myndir