Seinasti dagur á TeenStreet

Aftur í ár hava føroyskir ungdómar verið á TeenStreet leguni, sum í ár varð hildin í Offenburg í Týsklandi.

Einir 200 føroyskir luttakarar hava verið á leguni í ár, og eisini hava ein rúgva av hjálparfólki luttikið. Lovsangsbólkurin, sum spælir fyri ungdóminum hvørt kvøld í sonevnda "Throne Room" er í ár mannaður við føroyingum.

Á upptøkuni niðanfyri sæst videobrot frá í gjárkvøldið tá "Stór er tín trúfesti" varð sungin.

Legan byrjaði leygardagin, og í kvøld endar hon so. Flestu føroyingarnir fara av økinum og við bussi til Strasbourg, har flogfar hjá Atlantsflog stendur og bíðar teimum fyri at flúgva tey beinleiðis til Føroyar.