Skal inn til løgtingsformannin klokkan 12

Allir flokkar uttan Fólkaflokkurin vístu á Aksel V. Johannesen, formann javnaðarfloksins, sum samráðingarleiðara, tá formansumfar var fyrrapartin mánadagin í seinastu viku.

Mánadag og týsdag vóru samráðingar um at skipa nýggja landsstýrissamgongu millum Javnaðarflokkin, Sambandsflokking og Tjóðveldi. Tann royndin bar ikki á mál.

Síðan mikudagin hava samráðingar verið millum Javnaðarflokkin, Tjóðveldi og Framsókn um at skipa nýggja landsstýrissamgongu. Tær samráðingarnar eru enn í gongd. Klokkan 12 skal Aksel. V. Johannesen inn til løgtingsformannin at greiða frá, hvussu royndirnar at skipa samgongu hava gingist.

Aksel V. Johannesen hevur sagt við Portalin, at um tað gongur væl, so fer hann at siga við løgtingsformannin, at vit hava eina samgongu. Gongur tað minni væl, so fer hann at biðja um longda freist. Og gongur tað heilt illa, so fer hann at siga, at samráðingarnar ikki bóru á mál.