Spæl Føroyskt vikan í nýggjum hami

Spæl Føroyskt vikan verður aftur á skránni í ár, frá 6. til 12. mars, men hesaferð í nýggjum hami. Tað verður bæði ein vika, har KVF fer at spæla føroyskan tónleik burturav og ein vika við framførslum og framløgum við føroyskum tónleiki kring alt landið, og enntá á føroyskum sendistovum úti í heimi.

Tað er Tónleikasamband Føroya og KVF, sum samstarva um Spæl Føroyskt.

- Við Spæl Føroyskt vikuni, seta vit føroyskan tónleik á breddan og eggja spælistøðum, stovnum, fyritøkum og privatpersónum at mynda vikuna, júst sum teimum lystir, sigur Dánjal á Neystabø, formaður í Tónleikasambandi Føroya.

- Tað kann vera ein framførsla í eini frisørsalong, ein barnagarður, sum framførir á einum ellisheimi ella felagssangur í eini hugnaligari stovu. Tað er bert hugflogið, sum setur mørk, sigur Dánjal.

- Men hví hava eina Spæl Føroyskt viku?

- Við Spæl Føroyskt vikuni vilja vit virka fyri einum livandi tónleikalívi, sum styrkir bond og skapar savningarmegi innan føroyskan tónleik. Tá vit siga føroyskan tónleik, meina vit við allan tónleik, sum er framførdur ella framleiddur av føroyingum, alt frá Kingo sálmi, til tungmálm, rapp og føroyskan dans. Hetta er veruliga ein vika, ið heiðrar føroyskum tónleiki í breiðastu merking, sigur Dánjal og leggur afturat:

- Við hesum eru vit eisini við til at stimbra føroyska tónleikaarvin og málið.

Hæddarpunktið í Spæl Føroyskt vikuni er FMA (Faroese Music Awards), sum verður í Norðurlandahúsinum 11. mars og sent beinleiðis í KVF, her føroyskur tónleikur verður fagnaður og heiðraður.

Tónleikasamband Føroya fer so líðandi at avdúka ymsu tiltøkini kring alt landið á sosialu miðlunum. Fólk, ið ynskja at skipa fyri onkrum og harvið gerast partur av Spæl Føroyskt skránni, kunnu seta seg í samband við fyrireikararnar á [email protected].