Startskotið til valið í landsins størstu kommunu verður hóskvøldið

- Tað er spenningur í luftini, nú kommunuvalið 2024 nærkast í størstu kommununi í landinum. Og øll eygu og oyra fara at venda móti fyrsta almenna kjakfundinum, sum er garantur fyri spenningi og undirhaldi. Hetta startskotið verður karmur um allar politisku flokkarnar og listarnar, og eisini forvitnir borgarar sum eisini hava møguleika at koma til orðanna.

Soleiðis skrivar Tórsgøta í tíðindaskrivi um fyrsta almenna valfundin í Tòrsvhavnar kommunu upp til valið 12. november.

Pallborðsfundurin verður í morgin á Reinsarínum, har valevnini fara at greiða frá sínum málum og visjónum.

Journalistin Beinta Løwe, sum áður hevur verið á tingi, verður orðstýrari.

- Ein orðstýrari, sum ikki er bangin fyri at spyrja teir røttu spurningarnar og dugir at gera torfør politisk evni einføld.

Startskotið er ikki bara ein møguleiki at hoyra politikarar tosa, tí tað verður eisini møguleiki at luttaka í samrøðuni. Tað verður tíð løgd av til spurningar frá fjøldini, skriva fyrireikarar,

- Vit mæla borgarum í kommununi at luttaka og blíva klókari uppá, hvat politikararnir hava at siga, so tú fært eina hóming av, hvar tín krossur skal setast.

Kjakfundurin er á Reinsarínum hósdagin tann 17. oktober klokkan 19.