Stoltenberg fer frá sum Nato-aðalskrivari í heyst

Jens Stoltenberg ætlar sær ikki at søkja um at leingja sína tíð sum aðalskrivari hjá Nato, og fer hann eftir ætlan frá í heyst, upplýsir verjusamgongan.

Mandatið hjá Jens Stoltenberg er longt tríggjar ferðir, og hevur hann sitið sum aðalskrivari í nærum níggju ár.

Jens Stoltenberg er útbúgvin búskaparfrøðingur og fyrrverandi forsætisráðharri í Noregi.

Stutt eftir, at Russland gjørdi innrás í Ukraina í februar í fjør, varð tíðin hjá Stoltenberg sum aðalskrivari long fram til 30. september í ár, og sambært dulnevndum keldum, vilja Nato-limalondini hava hann at halda fram til apríl 2024 orsakað av hansara "einastandandi avriki", skrivar Ritzau.

4. apríl næsta ár eru eisini 75 ár liðin, síðan Nato varð sett á stovn, og sambært týska miðlinum Welt am Sonntag, ynsktu limalond, at Stoltenberg skuldi halda fram til tá.

Enn er eingin avgerð tikin um, hvør eftirmaðurin hjá Stoltenberg verður, men í uppskoti er m.o. Pedro Sanchez, forsætisráðharri í Spania, og Ben Wallace, bretski verjumálaráðharrin, skrivar Reuters.