Stranda Sjónleikarafelag nýtt limafelag í MáF

Meginfelag áhugaleikara Føroya, MáF, hevur fingið nýtt limafelag.

Tað er Stranda Sjónleikarafelag, sum hevur biðið um at gerast limur í MáF aftur, eftir at felagið varð endurstovnað 5. desember. Felagið hevur annars ligið stilt í 20 ár.

Áhugin fyri at endurstovna Stranda Sjónleikarafelag var stórur, tá kallað varð til fundar at endurstovna felagið í bygdahúsinum á Strondum, og væl gekk við at manna nevnd.

Tey, sum vórðu vald í nevndina hjá Stranda Sjónleikarafelag, eru hesi:

Turið Dyssegaard, forkvinna.
Vár Hjørleivsdóttir Johansen, næstforkvinna.
Marjun á Fríðriksmørk, skrivari.
Jan í Giljum, kassameistari.
Nicolina í Lág Jøkladal, nevndarlimur.

Tiltakslimir eru Hansa Olsen og Marita á Fríðriksmørk.

MáF fegnast um, at Stranda Sjónleikarafelag er endurstovnað, og ynskir felagnum hjartaliga vælkomið sum limafelag í MáF aftur.

Stranda Sjónleikarafelag verður sostatt áttanda sjónleikarafelagið undir Meginfelag áhugaleikara Føroya. Hini feløgini eru: Sjónleikarafelagið Glotti, Havnar Sjónleikarafelag, Klaksvíkar Sjónleikarafelag, Suðuroyar Sjónleikarafelag, Ungmannafelagið Royndin, Ungmannafelagið Virkið og Dramaverkstaðið.