Tingið ikki opið fyri almenninginum komandi tíðina

Næstu dagarnar fer Løgtingið ikki at hava opið fyri almenninginum, og tikið verður heldur ikki ímóti vitjandi. Hetta er orsakað av koronustøðuni.

Løgtingsformaðurin heitir eisini á tingfólk um at fylgja almennu tilmælunum og vera ansin komandi tíðina. Heitt verður m.a. á tey um at lata seg kanna – serliga tey, sum ikki eru koppsett, ella sum kunnu hava verið útsett fyri smittuvanda ella kenna okkurt á sær. Í skrivi, sum sæst á heimasíðuni hjá løgtinginum, varð m.a. heitt á tingfólk, fjølmiðlar og onnur, sum koma í tingið í arbeiðsørinum, um at lata seg kanna áðrenn tingfundin í dag.

Avgerð er eisini tikin um, at tingfólk ikki verða skrásett fyri fráveru komandi tíðina. Heitt var eisini á tingfólk um ikki at koma fleiri í tingið, enn tørvur er á.

Á skránni á dagsins tingfundi, sum byrjar klokkan 10, eru níggju 1. viðgerðir og ein 3. viðgerð á skránni, og skilagott kundi veirð, at samgonga og andstøða gjørdu eina clearingsavtalu til 3. viðgerðina um neyðugt, verður sagt í skrivinum.

Les eisini: Níggju 1. viðgerðir á skránni í dag