Tummas Kannuberg virkandi sóknarprestur í Sjóvar prestagjaldi

Tummas Kannuberg verður virkandi sóknarprestur í Sjóvar prestagjaldi fýra teir fyrstu mánaðirnar í komandi ári. Tað var avgjørt á felags kirkjuráðsfundi í Sjóvar prestagjaldi 4. oktober.

Sóknarpresturin tey seinastu 13 árini, Símun Persson Jacobsen, fer í lestrarfarloyvi nevnda tíðarskeið. Skipanin innan fólkakirkjuna leggur upp til, at tveir sóknarprestar kunnu fara í farloyvi um árið við lestri í hyggju.

Tummas Kannuberg, ið er ættaður úr Leirvík, tók prógv sum gudfrøðingur á Keypmannahavnar Universiteti í 2021. Tummas hevur síðani m.a. starvast sum námslektari á námsvísindadeildini í Fróskaparsetri Føroya. Í løtuni er hann sóknarprestur í Sparkær-Gammelstrup og Stoholm í Viborg Stift, har hann hevur verið prestur í eitt gott ár.