Tveir mans bjargaðir úr søkkandi útróðrarbáti

Tveir mans vóru í dag tiknir upp úr sjónum av bjargingartyrluni hjá Atlatnsflogi.

Menninir fóru í flótidraktirnar og á bláman, tá bátur teirra fór at leka undir útróðri, einar fimm fjórðingar vestan fyri Sandoynna.

Tyrlan var skjót á staðnum, tók menninar upp, og fleyg teir til havnar, upplýsir vakthavandi á MRCC.

Menninir náddu sjálvir at ringja og biðja um hjálp áðrenn teir fóru av bátinum. Hetta var beint fyri klokkan 13 í dag. Óvist er hví báturin fór at taka sjógv inn.

Sum skilst er báturin ikki sokkin enn. Ein annar útróðrarbátur hevur fingið ein enda á, og bjargingarbáturin Rescue Arun er á veg úr Havn til staðið við pumpum fyri at vita, um tað ber til at bjarga bátinum í land aftur.

Av MRCC ynskja tey ikki í núverandi løtu at upplýsa hvør bátur talan er um.