Twice Colonized í Filmsfelagnum

Týsdagin í komandi viku, 11. apríl, sýnir Filmsfelagið nýggja grønlendska heimildarfilmin Twice Colonized, boðar Filmsfelagið frá í tíðindaskrivi.

33 ára gamla Lin Alluna, ið er útbúgvin á Danska Filmskúlanum í 2017, hevur í sjey ár gjørt heimildarfilmin, sum fekk tann sjáldsama heiður at verða frumsýndur á Sundance Film Festival í januar, og fyri stuttum at verða setanarfilmur á CPH:DOX.

Twice Colonized, sum varir hálvan annan tíma, er ein lýsing av grønlendsku Aaju Peter (f.1960), sum sigur við danska filmstíðarritið Ekko, at "Danskerne skal afkoloniseres!"

Filmurin sigur søguna um sakføraran og mannarættindastríðskvinnuna, Aaju Peter, sum stríðst fyri rættindum hjá inuit í Arktis, og vil hava eitt fast ES-ting fyri upprunafólk. Tá ein sorgarleikur rakar fólk, ið eru tætt at henni, fer Aaju at leita upp hendingar í egnari fortíð, samstundis sum hon frameftir setir sær fyri at tryggja upprunafólkinum frælsi og fólkaræði. Men ber tað til, at broyta heimin og samstundis lekja egin sár?

Í filminum fáa vit innlit í tankar um kolonialismu, sum ikki er av, og í arbeiðið hjá Aaju Peter í Grønlandi, Danmark og nýggja heimlandinum Kanada, har hon nú býr og virkar, skrivar Filmsfelagið.

Twice Colonized er fyrsti filmur hjá donsku Lin Alluna.