USA aftur limur í Unesco

Fríggjadagin gjørdist USA aftur limur í Unesco, ið er ST-felagsskapinum fyri útbúgving, vísind, mentan, og samskifti.

132 av teimum 193 ST-limalondunum atkvøddu fyri at loyva USA við aftur í felagsskapin. Tíggju lond atkvøddu ímóti, og 15 lond tóku ikki lut í atkvøðugreiðsluni. Millum tey londini, sum atkvøddu ímóti vóru Russland, Sýria, Iran og Kina.

Tað var í oktober 2017, at táverandi amerikanski forsetin, Donald Trump legði Unesco undir at vera antiisraelskt og boðaði frá, at USA fór úr felagsskapinum. Stutt aftaná hetta fór Ísrael eisini úr felagsskapinum.

Í fleiri ár var USA tað limalandið, sum lat størsta fíggjarliga ískoytið, men eftir at Palestina gjørdist limur í 2011, steðgaðu gjaldingarnar úr USA.

Umsitingin hjá amerikanska forsetanum, Joe Biden hevur biðið um 150 milliónir dollarar, ið svarar til eina góða millión í okkara krónum á fíggjarlógina fyri komandi ár fyri at dekka limagjald, eisini fyri seinastu fimm árini.

Tilsamans skyldar USA Unesco 619 milliónir dollarar, ið svarar til 4,2 milliardir krónur, skrivar Ritzau.