Uttanlands

USA: Beto O'Rourke uppgivið at gerast forsetavalevni

Fyrst varð hann sæddur sum ein av favorittunum, men seinastu tíðina hevur hann ligið langt aftanfyri í veljarakanningum

Beto O'Rourke (Mynd: EPA)

Beto O'Rourke (Mynd: EPA)

2019-11-02 10:20 Author image
Alda Nielsdóttir

Beto O'Rourke hevur uppgivið at gerast forsetavalevni hjá demokratunum til amerikanska forsetavalið 2020.

Hesum boðaði hann frá í gjár, eftir at undirtøkan hjá honum hevur staðið í stað í øllum veljarakanningunum seinastu mánaðirnar.

- Hóast tað er ringt hjá mær at góðtaka, stendur tað nú greitt fyri mær, at hetta valstríðið ikki fer at eydnast, segði 47 ára gamli Beto O'Rourke sambært Ritzau.

Fyrrverandi Texas-politikarin byrjaði sítt valstríð í mars við góðari undirtøku frá veljarum, og varð hann at byrja við sæddur sum ein av favorittunum at gerast demokratiska forsetavalevnið.

Men hóast Beto O'Rourke hevði góða undirtøku í heimstatinum Texas, hevur undirtøkan ikki verið eins góð kring alt USA.

Seinastu tíðina hevur hann fingið um tey tvey-trý prosentini í øllum veljarakanningum, og hevur hann sostatt ligið langt aftanfyri eitt nú Joe Biden, Elizabeth Warren og Bernie Sanders.

Les eisini: Veljarakanning: Joe Biden er enn favorittur

Umframt at hann nú gevst við valstríðnum um forsetaembætið, boðar hann eisini frá, at hann ikki stillar upp til amerikanska senatið næsta ár.

placeholder
placeholder