– Eitt tætt og avgerandi val

Trygdarpolitikkurin er og verður grundarsteinurin undir donskum politikki tey komandi nógvu árini.

Tað segði danski forsætisráðharrin, Mette Frederiksen í røðu sínari, tá hon um middagsleitið útskrivaði fólkatingsval at vera 24. mars.

Les eisini: Fólkatingsval verður 24. mars

Mette Frederiksen legði m.a. dent á stríðið um Grønland, sum amerikanski forsetin, Donald Trump hevur boðað frá, at hann ynskir at yvirtaka.

– Tað fall í okkara lut at handfara størstu uttanríkispolitisku kreppuna, sum Danmark hevur verið í síðan seinna heimsbardaga, og hóast hon á ongan hátt er av, er tað kortini eydnast okkum at klára hana higartil - við tøttum samstarvi við Grønland, við restina av fólkatinginum og við góðum samstarvsfeløgum í Evropa.

Ábendingar eru um, at talan verður um eitt tætt val og eitt sera týðandi og avgerandi val, segði danski forsætisráðharrin.

– Tað verður komandi fýra árini, at vit sum Danir og evropearar av álvara skulu standa á egnum beinum. Vit skulu lýsa okkara samband við USA, vit skulu dubba okkum fyri at tryggja frið á okkara meginlandi, vit skulu halda Evropa saman og tryggja framtíðina hjá ríkisfelagsskapinum.

Danski Javnaðarflokkurin við Mette Frederiksen á odda hevur seinastu trý árini skipað stjórn við Vinstra og Moderaterne, og Mette Frederiksen útilokar ikki, at ein stjórn tvørturum miðjuna kann koma uppá tal eftir valið.

– Eg fari ikki at útiloka nakað frammanundan, segði hon.