- Heitt á løgtingsformannin at loysa meg úr embætinum

Javnaðarflokkurin ætlar at samráðast við andstøðuna frá farna valskeiði, og tí letur Bárður á Steig Nielsen nú mandatið at samráðast frá sær.

Tað segði hann við útvarpið á middegi.

- Eg havi tosað við Aksel V. Johannsen í morgun, og hann ynskir at fáa samráðingarrættin. Eg havi tí heitt á løgtingsformannin at loysa meg úr embætinum, segði Bárður á Steig Nielsen.

Næsta stig er sostatt, at formansrunda verður, har forfólkini í flokkunum peika á ein samráðingarleiðara at skipa nýggja samgongu.

Bárður á Steig Nielsen kundi latið mandatið frá sær longu í gjár, men hann valdi at bíða eftir boðum frá Javnaðarflokkinum. Tey boðini hevur han altso fingið, og tey eru, at mann ætlar at samráðast við Tjóðveldi og Framsókn fyrst.