– Partar av friðarætlanini eru jaligir

Russiska stjórnin hevur fingið nýggjastu útgávurnar av amerikanska uppskotinum fyri friðarætlan, sigur Jurij Usjakov, uttanríkispolitiskur ráðgevi hjá russiska forsetanum, Vladimir Putin.

Um sjálva ætlanina sigur hann, at tað eru ávísir partar, sum eru jaligir, men nógvir aðrir skulu umrøðast nærri av serfrøðingum, sigur hann.

Hann váttar samstundis, at umboð fyri Russland og Ukraina hava fundast í Abu Dhabi, og at russar eisini hittu umboð fyri USA. Tað var tó ikki friðarætlanin, sum var á skránni tá, sigur hann sambært Ritzau.

– Nei, friðarætlanin varð ikki umrødd í Abu Dhabi. Friðarætlanin er ikki umrødd í smálutir.

Í staðin tosaðu russar og ukrainar um m.a. fangabýti.

Tað var í farnu viku, at USA legði fram eitt uppskot til friðaravtalu, sum innihelt fleiri ásetingar um, at Ukraina m.a. skal geva Russlandi Donbas-økið og lova ikki at innlima seg í Nato. Eftir fundir millum USA og Ukraina er ætlanin tó broytt nakað.