– Tað verður eitt nei takk herfrá

Grønlendski landsstýrisformaðurin, Jens-Frederik Nielsen ynskir ikki at taka ímóti einum amerikonskum sjúkrahússkipi.

– Tað verður eitt nei takk herfrá, ger hann greitt í dagføring á Facebook.

– Vit hava eitt alment heilsuverk, har viðgerð er ókeypis hjá borgarum. Tað er eitt tilvitað val. Og ein grundleggjandi partur av samfelagi okkara. Soleiðis er tað jú ikki í USA, har tað kostar pengar at fara til lækna, sigur hann.

Jens-Frederik Nielsen leggur afturat, at grønlendingar tó framvegis eru opnir fyri samskifti og samstarvi við amerikanarar.

– Men tosið nú við okkum í staðin fyri bert at koma við meira ella minni tilvildarligum útsagnum á sosialum miðlum, sigur hann.

– Samskifti og samstarv er treytað av, at avgerðir um okkara land takast herheima.

Tað var sunnunáttina, at amerikanski forsetin, Donald Trump legði út eina vitlíkismynd av einum sjúkrahússkipi á Truth Social og skrivaði, at amerikanarar ætla at senda eitt sjúkrahússkip til Grønalands at taka sær av teimum sjúku, sum ikki fáa neyðugu viðgerðina í Grønlandi.

Les eisini: – Sjúkrahússkip ávegis til Grønlands