- Tað er sera frekt, at mann ikki eingang verður eftirspurdur sum ognari av navninum, og at tað bara verður stolið frá einum.
Soleiðis sigur handils- og miðlamaðurin Símun á Høvdanum í Klaksvík, sum eftir øllum at døma gjørdist bilsin, tá tað í gjár varð kunngjørt, at nýggja mentanarhúsið í Klaksvík skal hava navnið Varpið.
Les eisini: Mentanarhúsið skal eita varpið
Símun kann við einum skjali frá Skráseting Føroya vísa á, at tað er hann – ella rættara sagt felaghansara Spf. Klips – sum eigur rættin til Varpið.
Í grein á tíðindasíðu síni, news.fo í dag vísir Símun á Høvdanum á, at hann als ikki góðtekur, at navnið verður tikið frá honum.
- Klaksvíkar kommuna má finna sær eitt nýtt navn til mentanarhúsið, tí navnið Varpið eigi eg, skrivar hann á news.fo.
Símun á Høvdanum vísir í skrivinum á, at hetta er aðru ferð, at kommunan leggur hond á eina av hansara ognum.
Í hinum førum er talan um “Kioskina hjá Hans”, sum uttanhansara loyvi varð flutt og latin einum heimleysum at búgva í fyri síðan at verða brend á buckwald. Kioskin var ein býarmynd í Klaksvík.
- Vit fingu null krónur fyri ta beistagerðina, og nú er Klaksvíkar kommuna í ferð við at stjala navnið Varpið frá okkum, og tað sleppa teir ikki við, skrivar Símun á Høvdanum.
Vinarliga broyt tínar kennifíla - og privatlívsstillingar fyri at síggja hetta innihald