07-Vestur viðhaldsfólkini loyptu ótta á havnarfólk

Klokkan 17.39 í gjár fekk løgreglustøðin fráboðan um ógvusligan royk við Norðara Ringvegi í Havn, nærhendis Norðurlandahúsið.

Løgreglan varð send á staðið, men kundi skjótt staðfesta, at talan ikki var um eldsbruna, hvørki í húsum ella bili.

(Mynd: Sverri Egholm)

Hinvegin var talan um fjepparar hjá felagnum 07 Vestur, sum í felag vóru komin til Havnar at stuðla felagi sínum, sum skuldi spæla hálvfinalu í Gundadali móti HB í steypakappingini klokkan 18 í gjárkvøldið. Umframt at vera málað og ílatin í felagsins litum, so høvdu fjeppararnir eisini ríkiligt av neyðblussum, ið geva nógvan royk, við sær. 

Dyggi stuðulin frá vágafjepparum var tó ikki nóg mikið at koma víðari í kappingini. HB vann 2-1 og spældi seg í finaluna um Løgmanssteypið.

Sí eisini: Myndir: 07 Vestur innrás í Gundadali