Innanlands

1.075 kannað fyri andevni móti korona

Fríggjadagin kom tilfarið til analysu av blóðroyndunum úr Kina, og nú er gongd í kanningunum á Heilsufrøðiligu Starvstovuni. Úrslitið verður helst tøkt í komandi viku

2020-05-20 11:36 Author image
Agnar Prestá
placeholder

Um ein persónur hevur andevni (antistoff) móti korona í kroppinum, so hevur viðkomandi allarhelst havt virusið. Um slíkt verður funnið í fólki, so ber til at verða meira vísur í, hvat myrkatalið er - also tey sum hava verið smittaði, men sum ikki eru vorðin kannaði og hava fingið staðfest smittuna.  

Deildin fyri arbeiðs- og almannaheilsu hevði boðið 1500 tilvildarliga valdum fólkum úr øllum Føroyum at luttaka í verkætlan, har hetta varð kannað. Heilsufrøðiliga Starvstovan skrivar, at skotbráið at lata eina blóðroynd var bara nakrar dagar, men omanfyri túsund luttakarar meldaðu seg.

Blóðroyndirnar hava verið goymdar á Deildini fyri Arbeiðs- og Almannaheilsu, tí bíðað hevur verið eftir analysutilfarið, sum skuldi brúkast til at kanna royndirnar. Tað kom úr Kina fríggjadagin, og nú hevur Heilsufrøðiliga Starvstovan gjørt klárt, so at kanningarnar av COVID-19 andevnum kunnu gerast.

Heilsufrøðiligu Starvsstovan upplýsir, at 1075 blóðroyndir eru tiknar. Maria Skaalum Petersen, granskari, stendur fyri verkætlanini. Úrslitini av hesari kanningini verða helst tøk mitt í næstu viku. 

Á tíðindafundum um koronastøðuna hevur verið gjørt greitt, at myrkatalið í Føroyum helst er sera lágt. Ein kanning, sum varð tikin av landslæknanum Lars Fodgaard Møller í apríl, vísti, at hann hevði andevni móti korona í kroppinum. 

placeholder
placeholder