420 børn fingið jólahjálp í ár

Eins og undanfarnu ár, var aftur í ár skipa fyri jólahjálp til barnafamiljur, sum liva undir trongum fíggjarligum korum.

Enn eru tað nógvar barnafamiljur, ið hava torført við at fáa endarnar at røkka saman, og tað gleðir okkum at vit kunna veita eina hjálpandi hond, sigur Barnabati, sum skipar fyri innsavningini.

Hóskvøldið í farnu viku var liðugt at viðgera umsóknirnar og brøvini vóru pakkaði og latin Posta sama kvøld. Viðkomandi at viðmerkja er, at Posta ber út Jólahjálpina sum innskrivað sending. Hetta merkir, at um móttakarin ikki er við hús, tá ið Posta kemur framvið, verður ein lepi lagdur í postkassan, ið greiður viðkomandi frá, at eitt bræv liggur á nærmasta postkontóri klárt at avheinta.