55 smittað í løtuni: Eingin nýggjur tilburður seinastu tveir dagarnar

Kanningarnar frá fríggjadegnum og leygardegum eru nú liðugt greinaðar, og eingin nýggjur tilburður er staðfestur, vísa nýggjastu tølini hjá Landslæknanum.

Fríggjadagin vórðu 1.590 kanningar gjørdar, og í gjár, leygardagin, vórðu 727 kanningar gjørdar, og tær vóru allar negativar. Tilsamans eru nú 84.308 kanningar gjørdar í Føroyum.

Rættingar eru gjørdar í samlaða talinum á staðfestum tilburðum. Tríggir staðfestir tilburðir frá 18. august eru greinaðir umaftur, og hesir eru nú at rokna sum negativir. Tí minkar samlaða talið á staðfestum tilburðum í Føroyum við trimum, skrivar Heilsumálaráðið.

Tilsamans hava tí 381 fólk fingið staðfest korona í Føroyum, og 326 teirra eru staðfest frísk aftur, og sostatt eru 55 persónar smittaðir í løtuni.

Tríggir persónar eru í løtuni innlagdir á Sjúkrahúsverki Føroya í samband við koronasmittuna. 251 fólk eru í sóttarhaldi.