Aðalroynd seinnapartin - stóra løtan verður í kvøld

Herning, Danmark (Portalurin) - Eftir drúgva tíð við fyrireiking av øllum møguligum ymiskum slagi er dagurin endiliga upprunnin: Tá Sissal Jóhanna Norðberg Niclasen og sjey onnur skulu framføra tað, sum tey øll vóna er vinnaralagið og nóg mikið til at senda tey til Sveis í mai.

Hoyr samrøðu við Sissal frá seinastu viku: - Hetta kann vera ein vinnarasangur

Sangurin hjá Sissal, sum nógv fólk hava samstarvað um, og sum hon og nógv onnur avgjørt halda kann vera ein vinnarasangur í Herning í kvøld

Sí eisini: Eyðfinn Jensen:- Sissal hevur stjørnudygdir

Veddingarfyritøkur og ymiskir viðmerkjarar eru samd um, at tað er 30-ára gamla havnarkvinnan, sum er favorittur í Herning. Alt kann tó henda, nógvir heilt góðir sangir eru við, og tað snýr seg um at avrika á degnum, ið Sissal eisini sjálv vísir á.

Tað skal man helst longu seinnapartin, hóast stóra show'ið ikki er fyrr enn í kvøld klokkan 19. Aðalroyndin í Jyske Bank Boxen byrjar klokkan 14. Tá verða ikki so nógv fólk í stóru høllini, men dómsnevndin verður har. Teirra atkvøður telja fyri helmingin av tí samlaða, og dómararnir lurta og hyggja eisini til síðstu royndina. 

Til ber atkvøða í appini DR Grand Prix (Føroyska umboðið er: 7. Sissal - 'Hallucination' - Send HAL til 1212) Til stóra showið leygardagin ber eisini til at atkvøða við sms til 1212. Við sms krevst, at tú hevur pengar á tínum nummari. Hetta kann gerast umvegis sjálvavgreiðslurnar hjá Føroya Tele og Nema. 

Stutt fyri aðalroyndina eru tey luttakandi tøk til heilt stuttar samrøður í miðlaøkinum í Boxen. Her verður Portalurin til staðar. Seinni í dag lata vit okkara beinleiðis blogg upp, har til ber at fylgja gongdini og síggja myndir og úr Danmark.

Jyske Bank Boxen í Herning verður nýtt til alt møguligt og verður karmur um kappingina í kvøld (Mynd: Sverri Egholm)

Sí okkara samrøðu við Sissal Jóhannu frá í gjár her:

--

Danska Melodi Grand Prix byrjar klokkan 19 føroyska tíð. Tað sæst ikki í Kringvarpinum men á DR í sjónvarpinum ella á DRTV á heimasíðuni.

Sissal Jóhanna skal á pallin sum nummar sjey av teimum átta í røðini. Eftir øll hava sungið verður atkvøtt liðugt. Síðani koma trý víðari til donsku finaluna, har øll so syngja aftur.

Tann 30-ára gamla læraralesandi Oyrasundsbúgvin gongur í fótasporinum á mongum føroyingum, sum hava luttikið til Melodi Grand Prix áður. Tað byrjaði við Anniku Hoydal, Harkaliðnum og Alduni í 1979, og nú er tað triðja árið á rað, at ein føroyingur er valdur at vera millum tey, sum skulu kappast um Eurovision-pláss. Rani Petersen (Reiley) vann sær hendan rættin í 2023.

Sí eisini: Sissal er 12. føroyska umboðið í Melodi Grand Prix

Tað vera millum 25 og 35 føroyingar og stuðla Sissal Jóhannu Norðberg Niclasen á staðnum í kvøld. Her ímillum er tættasta familja og vinkonur.

Les eisini: Genturnar gleða seg ótrúliga nógv at síggja mammuna á stóra pallinum