Ætlar at stovna áhugafelag fyri koyristólsbrúkarar

Eftir ólavsøku verður eitt áhugafelag stovnað fyri koyristólsbrúkarar í Føroyum.

Tað sigur Kaj Leo Holm Johannesen, fyrrverandi løgmaður og løgtingsmaður fyri Sambandsflokkin.

Hann hevur autoimmunu sjúkuna CIDP og er sjálvur bundin at koyristóli.

Kaj Leo Holm Johannesen skrivar í dagføring á Facebook í dag, at hann vil arbeiða fram ímóti at Føroyar gerst heimsins koyristólsvinarligasta land.

– Øll, og eg meini øll, sum sita í koyristóli altíð ella styttri tíðarskeið, skulu fáa tað lættari.

Herfyri boðaði løgtingsmaðurin frá, at hann ætlaði at savna allar koyristólsbrúkarar í Føroyum til eitt koyristólstreff, har teir kunnu møtast og læra av hvørjum øðrum.

– Tá tú ert komin í koyristól, so kann tú líka so væl gera tað soleiðis, at tú ikki bert verður góður men sera góður at brúka ein koyristól. Eg ætli mær at samla allar koyristólsbrúkarar í Føroyum til eitt koyristólstreff, hvar vit øll møtast og læra av hvørjum øðrum, at gerast betur, bæði mentalt og kropsliga, skrivaði hann m.a.