Aftur ein tilburður á flogvøllinum

Ein nýggjur tilburður varð staðfestur í gjár. Tað vísa nýggjastu tølini hjá landslæknanum. Nú er talið av koronakanningum komið upp á 105.719.

Aftur hesaferð varð tilburðurin staðfestur á flogvøllinum, har øll ferðafólk verða kannað við komu til landið. Viðkomandi persónur er avbyrgdur, og landslæknin er í gongd við neyðugu smittusporingina.

Tilsamans hava 415 persónar fingið staðfest smittuna í Føroyum. Í alt eru 410 persónar staðfestir frískir aftur, og sostatt eru framvegis fimm persónar smittaðir í løtuni.

Ein persónur er í løtuni innlagdur á sjúkrahúsi í sambandi við koronasmittuna.