Aftur trupulleikar við Galaxy - siglir seinasta túrin á middegi

At lívið við Galaxy í 8-10 vikur ikki fór at vera so lætt, vóru suðuroyingar helst varugur við, áðrenn Smril fór í dokk - tí man hevði roynt tað áður,

Seinastu dagarnar hava fólk aftur ilskast. Í síðstu viku var tað eitt portur, sum ikki fór upp, so fólk noyddust at bíða við at sleppa í lan. Nú hava tað verið avlýsingar og broytingar fyri veður - hóast veðrið hevur verið so mikið gott, at hjá Smyrli hevði tað sum eingin trupulleiki verið at siglt.

Broytingar vóru sunnudagin og avlýsingar mánadagin, og fyrrapartin hevur Strandferðslan boðað frá, at Galaxy bert siglir ein túr afturat og ikki tríggjar, sum ferðaætlanin annars sigur.

Galaxy skuldi verið farin av Havnini nú klokkan tíggju. Ístaðin fer skipið suðureftir á middegi, og síðani liggur Galaxy á Krambatanga fyri dagin.

- Fyri veður fer Galaxy av Havnini kl. 12:00, og ikki kl. 10:00, í dag, mikudag 10. septembur. Túrarnir av Krambatanga kl. 14:00 og av Havnini kl. 17:30 verða ikki sigldir í dag, mikudag 10. septembur.