Atkomuligar matstovur heiðraðar

Allan juni mánað hava fólk sent felagsskapinum Megd uppskot um atkomuligar matstovur í Føroyum. Við hesum ynskir felagsskapurin fyri fólk, ið bera brek at vísa á týdningin í atkomu fyri øll.

Ein nevnd varð sett at meta um innkomnu uppskotini, samstundis sum eitt uppsøkjandi arbeiði varð gjørt. Í nevndini sótu Levi Hanusarson, Poula Reinert Olsen, Eyðun Hansen, Sonja Tausen og Ása Dánjalsdóttir, umframt forkvinnan og aðalskrivarin hjá Megd.

Tey fýra atlitini vóru: Góð atkoma, atkoma til vesi, møguleiki fyri at fáa ovurviðkvæmis vinarligan mat, her laktosu- og glutenfrían mat, og góð parkeringsviðurskifti.

Hesi atlit hava sum heild stóran týdning. Fólk, ið bera brek, skulu sleppa inn í bygningar, fram at ymisligum umhvørvi og øðrum hentleikum og tænastum, sum tøkar eru og verða veittar almenningi. Privatar eindir, sum veita hentleikar og tænastur, sum eru almenningi tøkar, skulu tí eisini vera atkomuligar fyri øll.

Í gjár vóru atkomuligu matstovurnar kunngjørdar á móttøku í MEGD-húsinum. Tær fáa viðurkenning fyri góða atkomu við einum lykli, ið verður sett á høvðusdyrnar í komandi viku. Lykilin vísir gestunum, at matstovan er atkomulig.

Matstovurnar, sum í dag hava fingið lykilin eru: Glasstovan, Tvøroyri, Fjørukrógvin, Vestmanna, Burger King, SMS, Hornið, SMS, Hotel Runavík, Systrar, Norðurlandahúsið í Føroyum, Hotel Hafnia, Tórshavn, Jacqson, Klaksvík, Matstovan, Hotel Føroyar, No. 12, Tórshavn, Seglloftið, Tvøroyri, Skeiva pakkhús, Tórshavn, Silo, Tórshavn og The Tarv, Tórshavn.

- Sjálvt um hesar nú hava fingið viðurkenning, eru vit vónandi ikki liðug at geva lyklar. Ætlanin er, at so hvørt, sum matstovur gerast atkomuligar, fáa tær lykilin frá Megd. Vert er eisini at nevna, at um ein matstova flytir í onnur høli, har atkoman ikki er í lagi, so flytir lykilin ikki við, skrivar Megd.