Bjørt Samuelsen spyr Helga Abrahamsen um plastdálking

Hvørji tiltøk at basa dálking við plasti á sjógvi og landi fer landsstýrismaðurin í umhvørvismálum at seta í verk?

Hetta ætlar Bjørt Samuelsen, løgtingskvinna fyri Tjóðveldi, at spyrja Helga Abrahamsen, landsstýrismann, tá munnligir fyrispurningar eru á skrá í Løtinginum í morgin.

Fyrispurningar hjá Bjørt Samuelsen eru soljóðandi:

1. Ætlar landsstýrismaðurin at seta í verk tiltøk at avmarka dálking við plasti, sum mælt er til í tilmæli frá Umhvørvisstovuni?
2. Um ja, hvørji av teimum 11 tilmælunum er ætlanin at fara undir fyrst og hvørji síðan?
3. Hvørji stig ætlar landsstýrismaðurin at taka fyri at styrkja samstarvið ímillum myndugleikar, vinnugreinar, áhugafeløg o.o., at fyribygja plastdálking av náttúruni?
4. Er ætlanin at fylgja samtyktini hjá ES um at minka um ávirkanina á umhvørvið av plastúrdráttum, sum øll norðurlond gjøgnum ES ella EBS verða bundin av?

Í viðmerking vísir Bjørt Samuelsen til eitt tilmæli frá Umhvørvisstovuni um ymisk tiltøk, sum kunnu vera við til at avmarka plastdálkingina og tryggja, at tað verður burturbeint á rættan hátt.

Tilmælini vóru handað táverandi landsstýriskvinnu í umhvørvismálum í vár, og eru tey 11 í tali:

1: Víðka pantskipanina fyri einnýtisíløt úr plasti.

2: Økja endurnýtslu av plasti frá bæði vinnu og húsarhaldum.

3: Gera virkisætlanir fyri at økja endurnýtslu og minka dálking við plasti frá ídnaði, landbúnaði, fiskivinnu og ferðavinnu o.ø.

4: Upplýsing til borgaran um plast.

5: Minka nýtsluna av beriposum úr plasti.

6: Forboð fyri høglskálum úr plasti.

7: Banna ella avmarka nýtsluna av einnýtis borðbúnaði o.ø. úr plasti, eitt nú knívum, gaflum, skeiðum, tallerkum, súgvirørrum, vattpinnum og pinnum til ballónir.

8: Forboð fyri smyrsli o.ø., sum hava mikroplast í sær.

9: Kunngerð um graslíkisvøllir.

10: Stuðulsskipan til havnir/skip, ið taka ímóti burturkasti, sum er tikið upp úr sjónum.

11: Loysn á dálking við spreingileidningum.