Brutu inn í ein skúr at sova

Hóast Herbergið hevur fingið seks sovipláss afturat, tykist tað ikki at nøkta tørvin hjá heimleysum í Havn.

Aftur gjáramorgunin fekk løgreglan fráboðan um, at onkur hevði brotið seg inn í ein arbeiðsskúr í Havn, og reitt sær ból.

Ein pláta, sum var fyri vindeygað var tikin frá, men annars var einki brotið.

Í nátt var ein patrulja eisini og hugdi eftir hesum sama arbeiðsskúrinum, og har var eingin.

Á løgreglustøðini í morgun, hava tey ikki fingið nakra fráboðan um ófrið í Basecamp, har heimleys annars hava hildið til og eru koyrd út í fleiri umførum.