Danmark: 128 tilburðir skrásettir seinasta samdøgrið

Seinasta samdøgrið eru 128 nýggir smittutilburðir staðfestir í Danmark, upplýsa landsins heilsumyndugleikar sambært DR.

Talið er nakað lægri enn í gjár, har talan var um 169, ið var hægsta talið síðan 27. apríl.

Les eisini: Danmark: Hægsta talið á smittaðum síðan apríl

Aarhus kommuna og Ringsted eru serliga hart rakt.

Av teimum 169 tilburðunum, sum vórðu skrásettir í gjár var meginparturin í Aarhus. Statens Serum Institut upplýsir, at av teimum royndunum, sum vórðu tiknar 7. august, vóru 139 positivar, og 83 av hesum tilburðunum eru í Aarhus.

Støðan í Aarhus hevur fingið myndugleikarnar at seta lokal tiltøk í verk. M.a. er munnbind nú vorðið eitt krav í almennu ferðsluni í býnum.

Les eisini: Strangari koronakrøv í Aarhus

Fríggjadagin varð eisini boðað frá, at har var lang bíðirøð uttanfyri kanningarstøðir í og nærindis Aarhus, skrivar Ritzau.

Ringsted er eisini hart rakt. 142 av starvsfólkunum á sláturvirkinum hjá Danish Crown í býnum hava nú fingið staðfest smittuna.

Sláturvirkið er nú stongt komandi vikuna, og øll starvsfólk eru send í heimauppihald.  Uml. 9.000 fólk arbeiða á sláturvirkinum.