Einki bendir á eldáseting í Hornabø

Fyri júst einum mánaða síðani í dag kyknaði ein stórur eldur í J.C.Svabosgøtu í Hornabø. 

Kanningardeildin hjá løgregluni hevur verið í gongd og hevur gjørt eina fyribils niðurstøðu.

Vaktleiðarin á løgreglustøðini í Havn kunnar fyrrapartin um, at fyribils niðurstøðan  sigur, at eingin tekin eru um, at eldurin er ásettur.

Tó skal einki útilokast enn, staðfestir vaktleiðarin. Kanningar halda fram, og ein endalig niðurstøða er á veg.

Eldurin var ógvusligur, og húsini fóru illa. Ein persónur varð fluttur yvir á Landssjúkrahúsið við roykeitran.

(Mynd: Sverri Egholm)