Eldgosið hildið uppat at goysa

Tað goysir nú ikki meira á Reykjanesi, og í løtuni er einki sum bendir á, at tað fer at goysa har fyribils.

Hetta skriva íslendskir miðlar í dag.

Tað var mánadagin at grótbræðing byrjaði at floyma úr íslendsku undirgrundini sjey kilomettar norðanfyri Grindavíkarbý á Reykjanesi.

Í løtuni sæst einki virksemi í sprungunum, men enn síggjast glóðir í groytinum.

Einki bendir í løtuni á, at tað er vaksandi seismiskt virksemi ella nakað annað sum bendir á nakað meira enn núverandi støðu, sigur Sig­ríður Magnea Óskars­dótt­ir, náttúrufrøðingur við Morgunblaðið.

Soleiðis sá út fyrr í vikuni (Mynd: EPA)

Hetta eldgosið var rættiliga kraftmikið í mun til onnur útbrot í Íslandi seinastu árini. Veðurstovan hevur mett, at umleið 100 til 200 rúmmetrar av groyti komu úr gosopinum um sekundið fyrstu tímarnar. Í byrjanini av eldgosinum við Fagradalsfjall fyrr í ár floymdu 19 rúmmetrar um sekundið úr gosopinum.