Elsa Berg setti tiltak í Reykjavík

Farna leygardag var mentanarnátt í Reykjavík. Føroyingar vóru lýstir sum heiðurgestur á hátíðini og nógv varð gjørt burturúr.

Sum siðvenja er, skipaði Sendistova Føroyar, stuðlað av Tórshavnar kommunu og føroyskum fyritøkum, fyri tiltaki í Ráðhúsinum í Reykjavík. Har hevði Gallarí Havnará framsýning við málningum hjá Torbjørn Olsen og Zacharias Heinesen.

Borgarstjórin í Reykjavík bjóðaði vælkomin, og síðan helt Elsa Berg setanarrøðuna, har hon legði dent á serliga sambandið millum Føroyar og Ísland, og hvussu ein mentan ongantíð stendur still, men allatíðina mennist.

Eftir røðuna framførdi føroyski bólkurin Katari nøkur løg, og so varð boðið til ein bita við føroyskum mati og drykkjuvørum.

Tiltakið í Ráðhúsinum eydnaðist sera væl. Nógv fólk koma á gátt, bæði føroyingar, føroyavinir og útlendsk ferðafólk, ið allarhelst fyri fyrstu ferð royndu skerpikjøt, turt tvøst og spik, og hugnaðu sær óført við práti um Føroyar og Ísland, mat og mentan.

Føroyska luttøkan í Reykjavík endaði við tónleikaframførslu, har bólkarnir Sakaris, Katari og Blátt Gras framførdu í stásiligu Hørpu.

Annars var mentanarnáttin í ár serstøk á tann hátt, at dentur var lagdur á, at tiltakið er eitt familjutiltak. Tískil var endin á hátíðini fluttur ein tíma fram til klokkan 22.