Færri ferðafólk vitja Grønland

Eftir fleiri ár við vaksandi ferðafólkatali, eru tað nú færri útlendingar, sum vitja Grønland.

Sermitsiaq skrivar, at fyrstu átta mánaðirnar komu 62.134 ferðafólk uttanríkis til Grønlands, og hetta eru 813 færri enn fyrstu átta mánaðirnar í 2018.

Og hetta hóast Air Greenland hevur havt ein lítlan vøkstur í sínum ferðafólkatali hetta sama tíðarskeiðið, skrivar Sermitsiaq.

Orsøkin skal tí finnast í Íslandi, har eitt nú lágprísfelagið WOW Air mátti støðga og harvið minkaði talið av útlendskum ferðafólkum til Keflavíkar viðyvir 13 prosentum.

Færri ferðafólk í Íslandi fær tí ávirkan á flúgvingina serliga millum Ísland og Grønland, skrivar blaðið.

Ilulissat er enn sum áður mest vitjaða staðið í Grønlandi. Sambært Visit Greenland er Ilulissat fult bókað sum ferðamannamál, og tí er uppgávan at lata eyguni upp fyri øðrum møguleikum at vitja Grønland.