Fara at selja sex-leikur í Havn

Ein nýggjur handil læt upp í gjár upp í C. Pløyensgøtu 4 í Havn. Handilin eitur Freya Leikur og hann deilir hølini við Valkyrja Tattoo Studio.

Vørurnar í Freya Leikur eru nakrar, ið ein ikki er vanur at síggja í handlum í Føroyum. Har ber til at keypa ymiskar sex leikur, hóast tað kanska ikki líkist teimum sex leikum, ið vit eru von at síggja. Leikurnar eru einfaldar og einslittar í vøkrum litum og sniðið er fagurfrøðiligt.

Hugskotið til handilin kom av, at fýra vinfólk hugsaðu “hví ikki?” og fóru til verka.

- Tað hevði leingi verið eitt ynski at arbeitt saman um eina verkætlan og tey blivu skjótt samd um at selja sex leikur í Føroyum var júst tað rætta fyri tey, skrivar handilin í tíðindaskrivi.

- Vinfókini mettu, at tað var týdningarmikið at kunna nerta við vørurnar og kunna fáa ráð og vegleiðing um brúk, reingerð og goymslu av leikunum. Eisini var týdningarmikið at hava fagurfrøðiligar vørur av tí, at sniðið kann halda fólki frá at nýta sex leikur um tey t.d. meta leikuna vera ov vulgera. Fyri summi er tað ein stuttlig leika og fyri onnur kann tað vera eitt gott hjálpartól tá tað kemur til samlegu.

- Bæði eru eins týdningarmikil og ein tílíkur handil er við til at avstigmatisera nýtsluna av sexleikum í Føroyum.

Motto ella niðurlagið hjá Freya Leikur er “meiri stuttleika, minni stigma”.

Handilin fer at hava opið týsdag til fríggjadag kl. 13 til 17.30 og leygardag frá kl. 10 til 14.