Fara undir samráðingar við Danmark fyrst í 2026

Nógv stór politiksk mál eru á skránni í næstum. Beint nú hevur Suðuroyartunnilin verið nógv á breddanum aftur, og samgongan hevur ymiskt, sum ynski er at náa innan næsta árið.

Sonevnda tjóðarsemjan er framvegis aktuell, hóast tað ikki hevur verið nógv at hoyrt um hana í seinastuni.

Men hetta hongur eisini saman við Danmark. Frihedsbrevet skrivar, at fundur var millum Aksel V. Johannesen og Mette Frederiksen 6. oktober í Keypmannahavn

Føroyska stjórnan vil fremja broytingar í ríkisrættarligu støðuni. Men danir hava ov nógv annað at hugsa um í løtuni - millum annað fyllur formansskapurin nógv.

- Í Føroyum eru vit samd um, at tað mest umráðandi er at røkka málinum, heldur enn at trýsta nakað ígjøgnum, sigur løgmaður við Frihedsbrevet.

Metta Frederiksen og Aksel V. Johannesen hava havt nógvar ymiskar fundur seinasta lítla árið (Mynd: Sverri Egholm)

Skulu samráðast í januar

Allir politisku flokkarnir á tingi - uttan Sambandsflokkurin - eru við í semjuni um grundleggjandi broytingar í viðuskiftunum Føroyar og Danmarkar ímillum.

Og tað verður eftir øllum at døma fyrst í 2026 at vit gerast klókari uppá, um hetta kann bera á mál.

Aksel V. Johannesen segði við Frihedsbrevet í gjár, at hann hevur gingið við til at bíða við at taka samráðingar upp, men at tær eftir ætlan byrjar í januar 2026.

Hetta vera helst torførar samráðingar, sigur løgmaður: - Ikki bara so at vit kunnu vænta at møta upp við einum uppskoti, sum danir beinanvegin skriva undir uppá.

Helst hava ríkisfundurin í summar og fundurin við forsætisráðfrúuna givið løgmanni nakrar ábendingar.  Júst hvat verður lagt á borðið frá føroyskari síðu fyrst í næsta ári er ikki endaliga greitt.

Sí eisini: (Video): - Noydd at endurskoða ríkisfelagskapin fyri at fáa olympiskan limaskap