Ferðafólk verður sent av landinum aftur

Løgreglan helt í gjár einum ferðafólki aftur, sum kom við flogfarinum hjá Atlantsflogi úr Edinburgh.

Tað vísti seg, at viðkomandi ikki hevði neyðugu loyvini í lagið til tess at koma inn í Schengen-land, upplýsir vaktleiðarin hjá løgregluni uttan tó at kunna koma nærri inn á, júst hví viðkomandi ikki kundi koma til Føroya.

Men talan er ikki um nakað kriminelt.

Vanliga verða ferðafólk í slíkum førum send aftur við fyrsta flogfari, men av tí at næsta flogferðin til Edinburgh ikki er fyrr enn hósdagin, so sleppur viðkomandi tó at vera her í nakrar dagar kortini.

Løgreglan hevur tikið passið frá viðkomandi fyri at tryggja sær, at persónurin ikki fer víðari til annað Schengen-land.