Fleiri og fleiri børn innløgd við RS-virus

Gigni boðar frá, at eingin mammubólkur eigur at vera fyribils.

Seinastu vikurnar hevur barnadeildin á Landssjúkrahúsinum havt fleiri og fleiri børn innløgd við RS-virusi, sigur Elmar Ósá, yvirlækni, við útvarpið.

Tað er óvanligt at børn vera innløgd við RS-virusi hesa árstíðina, tí vanliga er tað um veturin.

- Vit vita ikki hvussu nógv er í umferð, men vit síggja eina týðiliga hækking av RS-virus. Og tá vit vita, at tað serliga eru tey, sum eru yngri enn tríggjar mánaðar, sum blíva serliga sjúk, so halda vit at tað er best at bíða við mammubólkunum, sigu Elmar Ósá, yvirlækni á barnadeildini.

Fá børn hava í koronutíðini verið innløgd við smittandi sjúkum. Tað, at fleiri verða innløgd nú, kann hava samband við, at samfelagið er latið meira upp aftur, sigur Elmar Ósá við Kringvarpið.