Fleiri tiltøk í Meinigheitshúsinum á ólavsøku

Um ólavsøkuna verður skipað fyri fleiri tiltøkum í Meinigheitshúsinum í Havn, skrivar Trúboðin.

Í kvøld, olavsøkuaftan, er møti klokkan 20 við Ova Brim. Vælumtókti bólkurin Gadders framførir eisini á møtinum.

Eftir møtið ólavsøkuaftan er opið hús í Meinigheitshúsinum, har okkurt gott verður at fáa. Seinni á kvøldinum verður lovsangsløta á skránni.

Í morgin, ólavsøkudag klokkan 20 er aftur møti. Tá talar Heri Kjærbo, og eisini koma Erla Mortensen og Heðin Askham at framføra nakrar sangir. Áðrenn farið verið aftur at ganga oman og niðan, verður borðreitt við einum góðum drekkamunni.