Innanlands

Fólk úr 132 londum búgva í Føroyum

Alla hesa vikuna eru mongu útlendingarnir, sum búgva og arbeiða í Føroyum í miðdeplinum. Endamálið við Fjølmentanarvikuni er at varpa ljós á og fagna mentanarliga margfeldið í føroyska samfelagnum.

2023-10-23 09:05

Jan Müller

Fjølmentanarvikan varð sett í Norðurlandahúsinum fríggjadagin av landsstýrismanninum fyri integratión, Bjarna Kárason Petersen. Eftir tað talaði Heðin Mortensen, borgarstjóri.

Leygardagin lat Perlan í miðbýnum hurðarnar upp við fjølbroyttari matskrá, sum umboðaði mat og matsiðir úr mongum londum. Fjølmentanarvikan heldur fram við ymsum tiltøkum alla vikuna. Í kunningini um fjølmentavikuna stendur m.a. at lesa:

-Vit kunnu fagna mentanarliga margfeldið á ymiskan hátt, til dømis við matfagnaði, tónleiki, list, ítrótti, kunning, søgum og upplivingum. Ætlanin er, at Fjølmentanarvikan verður eitt afturvendandi átak, sum allar kommunur gerast partur av eftir førimuni.

Kommunur, frítíðarfelagsskapir, skúlar, áhugafeløg, fyritøkur og einstaklingar luttaka og skipa fyri tiltøkum í døgunum 20.-27. oktober, meðan Fjølmentanarvikan er.

Fjølmentanarvikan er ikki eitt politiskt átak, men ein fagnaður til frama fyri allar tær ymisku mentanir, ið eru í Føroyum.

Víðari verður sagt í kunningini, at Fjølmentanarvikan er fyri øll. -Tú kanst luttaka við at gera títt egna tiltak ella átak hesa vikuna. Tú kanst eisini luttaka saman við vinum, familju, starvsfelagum og øðrum, sum hava hug til at uppliva nakað nýtt, forkunnugt ella bara eitt sindur øðrvísi. Eisini kann tín skúli ella títt arbeiðspláss leggja eitt tiltak til rættis. Tín kommuna er eisini boðin at luttaka og verður møguliga karmur um okkurt tiltak á Fjølmentanarvikuni.

Myndirnar eru frá tiltakinum í Perluni leygardagin. Myndir: Jan Müller

Vinarliga broyt tínar kennifíla - og privatlívsstillingar fyri at síggja hetta innihald